Col 1 | NdeIBE | STEP | UPhawuli, umphostoli kaKhristu uJesu ngentando kaNkulunkulu, loThimothi umzalwane wethu,

Colossians 1

1 UPhawuli, umphostoli kaKhristu uJesu ngentando kaNkulunkulu, loThimothi umzalwane wethu,

2 Kubazalwane abangcwele labathembekileyo kuKhristu abaseKholose: Umusa lokuthula okuvela kuNkulunkulu uBaba kakube lani.

Ukubonga Lokukhuleka

3 Simbonga kokuphela uNkulunkulu, uYise weNkosi yethu uJesu Khristu, nxa silikhulekela,

4 ngoba sizwile ngokukholwa kwenu kuKhristu uJesu langothando elithanda ngalo abangcwele bonke – 5 Ukukholwa lothando okuvela ethembeni eligcinelwe lina ezulwini, eselezwa ngalo elizwini leqiniso, ivangeli, 6 eselifikile kini. Emhlabeni wonke ivangeli leli lithela izithelo njalo liyakhula, njengalokhu elibelikwenza phakathi kwenu kusukela ngelanga elalizwa ngalo lawuqedisisa umusa kaNkulunkulu ngawo wonke amaqiniso awo. 7 Lalifundiswa ngu-Ephafrasi, oyinceku kanye lathi ethandekayo, ongumfundisi othembekileyo kaKhristu emele thina, 8 owasitshelayo njalo ngothando lwenu kuMoya.

9 Ngenxa yalokhu, kusukela mhla sisizwa ngani, kasizange siyekele ukulikhulekela sicela uNkulunkulu ukuba aligcwalise ngokwazi intando yakhe ngakho konke ukuhlakanipha komoya kanye lokuqedisisa. 10 Sikhuleka ukuba liphile impilo efanele iNkosi lokuba liyithokozise ngezindlela zonke: lithele izithelo kuyo yonke imisebenzi emihle, ukwazi kwenu uNkulunkulu kukhule, 11 liqiniswa ngamandla wonke mayelana lamandla akhe amangalisayo ukuze libe lokubekezela kanye lesineke esikhulu, kuthi njalo ngokuthokoza 12 limbonge uYise owalenza lafanela ukuhlanganyela elifeni labangcwele embusweni wokukhanya. 13 Ngoba wasihlenga embusweni wobumnyama wasiletha embusweni weNdodana yakhe ayithandayo, 14 okukuyo ukuhlengwa kwethu, ukuthethelelwa kwezono.

Ukuphakama KukaKhristu

15 Yona iyisifanekiso sikaNkulunkulu ongabonakaliyo, izibulo kukho konke okwadalwayo.

16 Ngoba izinto zonke zadalwa ngayo: izinto ezisezulwini lezisemhlabeni, ezibonakalayo lezingabonakaliyo, loba kuyizihlalo zobukhosi kumbe amandla loba ababusi kumbe abaphathi; izinto zonke zadalwa ngayo zidalelwa yona.

17 Yona iphambi kwezinto zonke, njalo kuyo izinto zonke zibambene. 18 Iyinhloko yomzimba, ibandla; iyikuqala lezibulo elivela kwabafileyo ukuze ibe lobukhosi ezintweni zonke. 19 Ngoba uNkulunkulu wathokoza ukuba ukuphelela kwakhe kube kuyo, 20 lokuthi ngayo abuyisane lezinto zonke, loba kuyizinto ezisemhlabeni kumbe izinto ezisezulwini, ngokwenza ukuthula ngegazi layo elachithwa esiphambanweni.

21 Lina lake laba ngabehlukane loNkulunkulu liyizitha ezingqondweni zenu ngenxa yokuziphatha kwenu okubi. 22 Kodwa khathesi uselibuyisile ngomzimba kaKhristu uqobo lwawo ngokufa ukuze alimise lingcwele ebusweni bakhe, lingelasici njalo limsulwa –

23 uma liqhubeka ngokukholwa kwenu, ligxile njalo liqinile, lingasuki ethembeni eliliphiwa ngevangeli. Leli yilo ivangeli elalizwayo eselitshunyayelwe kuzo zonke izidalwa ngaphansi kwezulu, mina Phawuli esengibe yinceku yalo.

Ukusebenzela Ibandla KukaPhawuli

24 Khathesi ngiyathokoza ngokulihluphekela kwami, njalo ngiyagcwalisa emzimbeni okulokhu kusasilela mayelana lezinhlupheko zikaKhristu, ngenxa yomzimba wakhe, olibandla. 25 Sengaba yinceku yalo ngomsebenzi uNkulunkulu anginika wona ukuba ngililethele ilizwi likaNkulunkulu liphelele – 26 imfihlakalo ebifihlakele okweminyakanyaka kanye lezizukulwane, kodwa khathesi isibekwe obala kwabangcwele. 27 UNkulunkulu wathanda ukubazisa phakathi kwabezizweni inotho emangalisayo yemfihlakalo le, enguKhristu phakathi kwenu, ithemba lenkazimulo.

28 Sitshumayela yena, seluleke sifundise labantu bonke ngenhlakanipho yonke, ukuze abantu bonke sibalethe kuKhristu bephelele.

29 Ngisebenza nzima ukuba lokhu kufezeke, ngilwisa ngawo wonke amandla asebenza ngawo ngamandla angaka phakathi kwami.